Bawrhsap Donny Lalruatsanga chuan State Sorkar leh District Council Sorkar chuan thawhdunna ṭha tak an neih a pawimawh hle tih sawiin, District mipui hmasawnna atan ruahmanna awmte inpawhtlang taka hmalak a nih chuan hmasawnna pawn awmzia a neih a beisei tih a sawi.

LADC CEM N. Zangura pawhin Lawngtlai Bawrhsap tharin District Council ngaipawimawha a tlawh chu lawmawm a tih thu sawiin, hnam hnufual leh khawsak harsa zawk tamna Lawngtlai District ah Mizo ngei Bawrhsap a awm chu mipui pawh an thla a muang hle a ni a ti. Ram hma sawnna tur leh mipuite hamthatna tur vei tlang theuh an nih avangin theih tawp chhuaha hma lak ho zel an inhuam thu a sawi a.

He inkawmnaah hian LADC-a Executive Member i/c I&PR leh Revenue changtu Lalropuia Chinzah in tawiawmin, Bawrhsap hnenah hian Lawngtlai khawpui a ramdangmi zalen lutuk leh ramria insumdawn tawnna chu awmze nei zawka kalpui tul an tih thu an thlen a, Bawrhsap chuan a theih anga thuneitu sang zawk ah pawh lo thlen a tum thu a sawi. Bawrhsap hi President leh Treasurer, MJA Lawngtlai in an tawiawm bawk a ni.